Diepenheim
IVN
zondag14jan2018

Nieuwjaarswandeling

Ni-j-joarswandeling IVN Deep'n 2018

Op zundagmiddag zeuven januari heb ik met ekuierd deur ut mooie boetengebied van Deep'n, ut Westeflier. Vanaf herberg de Pol bunt wieleu met wal dree-en -twintig leu eerst noar ut Rosarium egoan. Doar kreeg'n wieleu van oonzen gids Harry Alberts oetleg oaver de waterhoesholding. Ik leep ok al mooi met de learzen deur de drek hen, want deur de reegn was ut good nat ewordn allemoale. Noa disse oetleg kuiern wieleu wieter in de richting van ut karkhof, langs disse weg stoat plantanen. Doar vertel'n Harry dat disse beume völle in grote steden staot, want zie könt good teeg'n vervuiling van de loch.

Veurbie ut karkhof komt wieleu bie un brugge. Doar ku'j mooi van oe of kiek'n. Harry verteld hier oaver de Regge, moar ik heb dat allemoale neet good eheurt, want der ston ok een mooie boerderieje en den heb ik op de prent ezet.

De tocht ging verdan oaver de Brinkmansdiek. Joop Damveld vertel'n oons, dat dit een zaandrugge is. Den in de iestied onstoan is. Van oet disse stek kön ie goat zeen dat Deep'n op een zaandrugge bouwt is vrogger. Een zaandrugge is een hoger geleag'n stuk groond. Wieleu staot op dat moment op ut hoogste punt. Ut oetzicht is machtig mooi. Ok vertel'n Joop oaver kampen en essen. Dat bunt hoger gelegen stuk'n groond, woarop boer'n hun boerderieje bouwden. Op een es stond'n meer boerderiejen en op een kamp moar ene en Deep'n was vrogger roond um de karke ebouwd, noe steet de karke an de raand van ut stedeke.

Ut kuiern wieter noar havezate ut westeflier. Harry hef hier ok van alles oet eleg, moar wat, dat wet ik neet, ik was drok in gesprek. Ut was ok zo een leuke groep met gezellige leu! Wal kan ik uleu vertel'n dat ik al is eerder met uwest bun. Toen he'k wal op elet. Harry hef toen verteld dat de familie den de havezate bouwt hef, rieke bunt eword'n deur de verkoop van beume veur de scheepsbouw van de VOC.

Wieleu leep'n wier verdan richting de veersprong. Bie een grote keije bleef de groep stoan. Harry vertel'n dat disse steen bie ut gemeentehoes van Deep'n eleegn hef, moar noe is hee terug ebracht noar de plekke waor ze um ongeveer evon had'n vrogger. Der steat ok een bordje bie en doarop steet ut volgende:

Ik lea in 't Westeflier

rustig tevrëane

toon stond 'k vuur 't gemeentehoes

fier rech overëane

Noe noa een reeks van joar'n

bin'k terugge op 't oäle nus

en doot miej een plezeer

loat miej hier noe met rus (t)

 

Mooi vin ik dat, int plat! Der steet allene neet bie, wie of dit eskreef'n hef, dat vin'k wal jammer.

Wieleu kuiern wieter noar de veersprong. Doar bunt wie eem an ewest veur een bak koffie,thee, chocolademelk en een onmeundig lekker stuk appelgebak. Dat kreeg'n wieleu an ebod'n deur de IVN. Ik hadde wal geerne ut recept wil'n heb'n van ut appelgebak, moar dat was uiteraard geheim!

Noa de koffie ging de tocht verdan richting ut moerasbos. En moerassig dat was ut!Wat een drekbende, moar ik hool der wal van. Lekker deur de drek banjern.

Wieleu kwam'n oet bie ut sterrebos en huize Diepenheim. Hieroaver hef Harrie een spannend verhaal verteld. Oaver ridders en gevecht'n tussen Gelre en Deep'n. Bommen Berend kwam ok nog veurbie in disse geschiedenis. Ut ging der in die tied good op. Met kanonnen en grote legers.

Woar noe huize Diepenheim steet, ston vrögger een burgt en den was neet makkelijk in te nem'n.

Aj der meer oaver wilt weet'n dan road ik uleu an um is een keer met te goan. Ut is een machtig mooie wandeling deur een prachtig mooi Deep'n en Westeflier. Ie zeet völle en leert völle (moj natuurlijk wal oplet'n en neet te völle praot'n zo as ikke).

Ik kieke alwier oet noar de volgende IVN wandeling. Ik hoope dat uleu dan ok allemaole met goat.

Ik wol de gidsen van de IVN ( der waarn der nog meer bie, moar ik wet neet meer hoe hun namen bunt) onmeundig bedanken veur een prachtigen middag. Töt de volgende keer.

Annemarie Damveld

nieuwjaarswandeling